ค่าวบ่าวใจ๋ไปหาสาว

กู้ภัย

ค่าวบ่าวใจ๋ไปหาสาว 
มะลิกันทัง ปุ๊ปังกาบล้อม มาหอมทั่วห้อง บุรีรัฐฐา 
ในโขงพารา จังหวัดแก้วกว้าง 
ปิ่ขอไหลตั๋ว เข้าปิงร่วมข้าง กับยอดคนงาม ฮ่างน้อย 
ขอปลูกสลิด ไว้ติดต่อร้อย เอาหวันกอดเกี้ยวลำคอ 
มาหอมกลิ่นรส แม่คำสมอ อกปุ๊ดโทนอ หัวใจ๋แห่งข้า 
ตั้งหันญิงเรา แม่เปากาบอ้า หัวอกจายดา เกือบยุบ 
ปิ้ซัดต๋าหัน ขนคิงปอลุก ปิ้เมาเปี่ยงเง้อ คนงาม 
ฮักตั๋ว ฮักแต๊ เปียดเปียงข้าวหลาม เข้าสูนสานอูนอาน กะทิน้ำอ้อย 
ใจ๋ปิ้ได้ติด บ่บิดขว้างจ้อย จักก่อยจมเจย ก่าบย้ำ 
ติดหนักติดหนำ เหมือนผำติดน้ำ ติดเหมือนดั่งแก้ว ติดคำ 
หัวใจ๋ปิ้ไท้ จายได้ติดขำ ติดใจ๋ตึงวัน เหมือนฟืมติดฝ้าย 
ตั้งปิ้หันตั๋ว แม่ไหมซอนด้าย บ่โจ๋งจังนาย ง่ายนัก 
ขอปลูกสลิด ติดต้นสะลัก แก๋มดอกแก้ว ปูเลย 
ติดใจ๋ตั๋วน้อง กาบซ้อนเกี๋ยงเหมย เหมือนนกป้อเฮย ติดเฟยไม้แห้ง 
ติดใจ๋ตึงวัน เหมือนหน้าติดแป้ง ใคร่ผ่อกอยแยง ค่ำเจ๊า 
กันตั๋วออนญิง ฟู่แต๊เอาเต๊า บ่ป๋งปล่อยหื้อ จายใด 
ใจ๋ปิ้ติดน้อง เหมือนข้าวติดไห ใคร่ต๋ายเป๋นไฮ ไปติดไต่แก้ม 
ปิ้มีอักษร สุนทรบอกแจ้ง ถึงสายลอมแปง ที่ฮัก 
ปิ้ขอไหลตั๋ว เข้าปิงร่วมรัก น้องจักว่าด้วย สันใด 
บ่ได้น้องรัก แม่ม้อนต๋าไหล เฒ่าก็แล้วไป จ้างมันเต๊อะเจ้า 
ปัดแผ่นดินนอน กิ๋นบอนต๋างข้าว ก็ต๋ามเมืองลือ เล่าไว้ 
จับใส่หล้างคืน ตั๋วข้าปิ้ไท้ ฝันได้นั่งใกล้ นอนแยง 
หลับแถมหนึ่งครั้ง ซ้ำฝันหันแถม ว่าสายตีแปง นอนแยงร่วมผ้า 
ฝันครั้งถ้วนสาม ว่าตั๋วน้องหล้า เปื่อนจุจายมา เป่าว้าง 
ลวดเลยแจ้งเสีย ฝันหันสามครั้ง บ่เป๋นแน่หมั้น สักกำ 
ปุดโทเสีย นิมิตหลับฝัน เตียวไปเมื่อวัน เหมือนจักหันเจ้า 
น้องมาจุจาย เมาดายโศกเศร้า ทุกวันมา แหละน้อง 
ปิ้ผ่อสลิด เหมือนมีคู่ซ้อน สีเหลืองเปิดแห้ง ตวยลม 
กำฮักปิ้ไท้ ยังขนไปถม น้องซัดขว้างลง บ่หายเหิดแห้ง 
จับใส่หล้างคืน บ่หลับจ๋นแจ้ง ต๋าปอแดงเลือดย้อย..... 
ขอจบกล๋อนสาส์น ปิ้หนาน ปิ้น้อย ขอจบเท่าอี้เอวัง ก่อนแลนายเฮย
_________________